चिसोका कारण देशभरका जनजीवन प्रभावित, काठमाडौंमा वर्षा, हिमाली क्षेत्रमा भारी हिमपात

नारीकोसिस डटकम/पुस १८, काठमाडौं । पश्चिमी वायुको प्रभावका कारण बढेको चिसोले देशभरका जनजीवन प्रभावित बनेको छ ।

बुधबारदेखि चिसो बढ्दै गएपछि बिहीबार बेलुकाबाट हिमपात भएको हो । हिमपातले हिमाली जनजीवन निकै कष्टकर बन्दै गएको छ ।

कर्णालीका हुम्ला, डोल्पा, मुगु, कालीकोट र जाजरकोट जिल्लावासीको दैनिकी बढी कष्टकर बनेको पाइएको छ ।

काठमाडौंमा बिहानदेखि सिमसिम पानी परेको छ । काठमाडौंको आज बिहानको न्यूनतम् तापक्रम ५ डिग्री सेल्सियस रह्यो भने दिउँसोको अधिकतम् तापक्रम १६ देखि १८ डिग्री सेल्सियसबीच रहने महाशाखाले जनाएको छ ।

आज सबैभन्दा चिसो डडेल्धुरा रहेको छ । डडेल्धुराको आजको न्यूनतम् तापक्रम १.५ डिग्री सेल्सियस छ ।

आज शुक्रबार र भोलि शनिबार काठमाडौं उपत्यकासहितका पहाडी र हिमाली भेगको मौसम प्रभावित बन्ने बताउँदै महाशाखाकी मौसमविद् विभूति पोरखेलले बिहीवार साँझ भन्नुभयो–‘शुक्रबार मध्य र पूर्वीतर्फका अधिकांश भेगको मौसम प्रभावित रहन्छ, अन्यत्रको मौसम पनि प्रस्ट खुल्ने सम्भावना छैन।’