नारीकोसिस डटकम/सर्लाही । अन्तरजातिय विवाह गरेको भन्दै सर्लाहीमा केटाको आमालाई स्थानीय तहका जनप्रतिनिधिले दुर्व्यवहार गरेको आरोप लागेको छ ।

सर्लाहीको बरहथवा नगरपालिका वडा नम्बर १७ बस्ने जितेन्द्र राम र अन्जु रायले अन्तरजातिय विवाह गरेपछि जितेन्द्रकी आमा धनेश्वरीदेवीलाई वडाध्यक्ष रामविश्वास रायले हातपात गर्दै  दुरव्यवहार गरेको आरोप लागेको हो ।

गैरदलित युवतीसँग अन्तरजातिय विवाह गरेको भन्दै वडाअध्यक्ष र अन्जुको बाबु अभिनन्दन रायसमेतले आफूलाई अनेक धम्कीसहित दुरव्यवहार  गरेको धनेश्वरीदेवीले गुनासो गरिन् ।

प्रेमपछि भागेर अन्तरजातिय बिहे गरेका जितेन्द्र र अन्जु कक्षा ११ मा अध्ययनरत थिए । माइती पक्षको दवावपछि जितेन्द्र र अन्जु अहिले घरबाहिर नै लुकीछिपी बस्दै आएको बताइएको छ ।

यसैबीच घटनापछि पीडित धनेश्वरीदेवीले प्रहरीमा उजुरी दिएकी छिन् । उनको निवेदन दिएपछि प्रहरीले सुरक्षाको लागि प्रबन्ध मिलाएको र घटना बारे अनुसन्धान भइरहेको प्रहरी उपरिक्षक गोपालचन्द्र भट्टराईले जानकारी दिए ।