नारीकोसिस डटकम/चैत २५, जनकपुर । अस्पताल प्रशासनको कमजोरी र चिकित्सकको लापरबाहीका कारण जनकपुर अञ्चल अस्पतालमा पुनः एक बिरामीको मृत्यु भएको छ ।

आइतबार दिउँसो करीब साढे ३ बजे सामान्य ज्वरो भई उपचारका लागि आएका जनकपुरधाम उपमहानगरपालिका ४ उतिमपुर निवासी इन्द्रेस चौधरीका अन्दाजी १७ वर्षीय छोरा शिवम चौधरीको उपचारमा लापरवाहीका कारण मृत्यु भएको आरोप परिवारजनले लगाएका छन् ।

शिवमलाई शुरूमा इमरजेन्सीमा भर्ना गरिएको थियो, त्यसको दुई घण्टापछि वार्डमा पठाइयो । त्यहाँ कुनै चिकित्सकले हेरचाह नगरेको र उपचार पनि नगरेको गुनासो पीडित पक्षको छ ।

घटना पश्चात् पीडित पक्षले अस्पतालविरूद्ध नाराबाजी र हो-हल्ला गरेका थिए । परिवारजनका अनुसार मृतक शिवम ५ दिनदेखि ज्वरोका बिरामी थिए र स्थानीय चिकित्सक आनन्द मिश्राकहाँ उपचार भइरहेको थियो ।

रूटिन चेकअपको क्रममा उनलाई आईतबार अञ्चल अस्पतालमा रेफर गरिएको थियो । पीडित पक्षले दोषी चिकित्सक र अस्पताल प्रमुखलाई कारवाहीको माग गरेका छन् ।