जीवनमा हरेकजसो कुरामा साना ठूला बाधाहरु आउँछन् । ती बाधालाई हामीले कसरी पन्छाउँछौं भन्ने कुराले नै हाम्रो जीवन कस्तो हुने भन्ने निर्धारण गरिरहेको हुन्छ ।

सफलताका बाधाहरु के हुन् ? कसरी पन्छाउने ?

वातावरण र स्रोतको कमी:
धेरैजसो भन्ने भनाइ छ, म यो गर्न चाहन्छु, तर वातावरण नै छैन, प्रशस्त धन छैन आदि । यही मानसिकताले योजनाहरु चिया गफमै सिमित हुन्छन् र हामी जहाँको त्यही हुन्छौं । ओप्रा विन्फ्रले भनेकी छिन्:  आफूसँग जे छ, त्यो कुरालाई उपयोग ग¥र्यो भने तिमीले आफूसँग जे छैन त्यो पाउनेछौं । यदि तिमी आफूसँग जे छैन त्यसमा केन्द्रित रह्यौ भने अहिले जति छ त्यतिमै सिमित रहनेछौं । आफूसँग अहिले भएका स्रोतको उपयोग गरौं, त्यो हाम्रो सपनाको, हाम्रो भविष्यको आधार हुनेछ । जब पाइला चाल्दै जान्छौं, आफूसँग नभएका स्रोतहरु पनि भेटिन
थाल्नेछन् ।

असफलताको डर:
असफलताको डरले गर्दा कैयौं मानिसहरुले आफ्नो सपना अनुसार हिड्ने सुरुवात नै गदैंनन् । हामी यो भ्रममा छौं कि, सफलता एउटा बिन्दु हो, जहाँ पुरस्कार हुन्छ, धन सम्पत्ति हुन्छ, खुसी मात्र हुन्छ । तर वास्तवमा सफलता एउटा प्रक्रिया हो, जहाँ असफलता मिसिएको हुन्छ । तपाई कुनै पनि काममा असफल हुनुभयो, तर  त्यही कामबाट तपाइले केही सिक्नुभयो भने त्यो पनि एउटा सफलता हो । त्यो सिकाइलाई आगामी दिनमा प्रयोग गरेर तपाई आफ्नो लक्ष्य प्राप्तिमा पुग्न सक्नुहुनेछ । संसारमा सफल भएका सबैजसो व्यक्तिहरु त्यसरी नै अगाडी बढेका हुन् ।

अनुभव तथा ज्ञानको कमी:
हामीले आफूसँग अनुभव तथा ज्ञान नै नभएको क्षेत्रमा हात हाल्यौं भने त्यसमा नैराश्यता उत्पन्न् हुने सम्भावना बढी हुन्छ । त्यसैले पहिले त्यो क्षेत्रको आधारभुत ज्ञान लिऔं, त्यो क्षेत्रमा सानो पददेखि ठूलो पदसम्मको जिम्मेवारी बुझौं, त्यहाँ कामको अनुभव लिऔं अनि मात्र अगाडि बढौं । सफल व्यवसायी ज्याक माले भनेका छन्:  यदि तिमीलाई अगाडी बढ्नु छ भने सानो कम्पनीमा काम गर । त्यहाँ तिमीले सानो पददेखि ठूलो पदसम्मको जिम्मेवारी, काम र तरिकाहरुको बारेमा ज्ञान लिन पाउनेछौं । जसले गर्दा तिमीलाई आफ्नै काम गर्न सहज हुनेछ ।

महत्वकांक्षा:
अति महत्वकांक्षा र महत्वकांक्षा नै नहुने व्यक्ति अगाडि बढ्न सक्दैनन् । सफल व्यवसायी वारेन बफेटले भनेका छन्:  नदीको किनारमा बसेर तिमी पारी पुग्न सक्दैनौ । र यदि नदीमा एकैपटक दुवै खुट्टा राख्यौ भने डुब्न पनि सक्छौ । पहिले एउटा खुट्टा मात्र नदीमा राखेर नदीको गहीराई नाप र त्यही अनुसारको नदी तर्ने निर्णय लेउ । जोखिम उठाउ, तर एकैपटक हाम नफाल । पहिले आफ्नो सपनाको आधार निर्माण गरौं र सफलताका खुड्किलाहरु चढ्दै जाउँ ।

अनुशासन, धैर्यता र लगनशीलताको कमी:
सफलताको लागि अनुशासनको आवश्यकता हुन्छ । खर्च गर्ने तरिका, काम गर्ने तरिका, आफ्नो प्रस्तुतिकरणमा अनुशासन भएन भने सुरुवातमा राम्रो सम्भावना बोकेको काम पनि असफल हुन्छ । त्यस्तै, सफलताको लागि धैर्यता र लगनशीलताको आवश्यक हुन्छ । काम गर्नसाथ आफूले सोचे अनुसारको नतीजा मिल्दैन । धैर्य रहेर लगनशीलताका साथ मेहनत गरिरहने व्यक्तिले नै लक्ष्य प्राप्त गर्न सक्छ ।