करेसाबारी र बगैंचाले तपाईलाई बनाउँछ खुसी र सक्रिय

तपाईं फुर्सदको समय कसरी कटाउनु हुन्छ ? यदि त्यो समय क्रियाशिल भएर कुनै न कुनै काममा व्यस्त भई विताउनु भयो भने त्यसले तपाईलाई मानसिक र शारीरिक रुपमा स्वस्थ्थ राख्न महत्वपूर्ण भूमिका निर्वाहा गर्दछ ।

तपाईंले आफ्नो घरको आसपासमा, छतमा, वार्दलीमा फूलहरु फुलाउन सक्नुहुन्छ । सागसब्जी रोप्न सक्नुहुन्छ । वनस्पति हुर्काउन सक्नुहुनेछ । यी सबै कुराले तपाईंको स्वास्थ्यमा प्रत्यक्ष प्रभाव पार्छ ।

ताजा सागसब्जी र अग्र्यानिक

आफ्नै बगैंचा वा करेसाबारीमा सागसब्जी रोप्नुभएको छ भने तपाईं बजारमा निर्भर भइरहनु पर्दैन । अहिले त्यसैपनि बजारमा उपलब्ध सागसब्जी शुद्ध र स्वस्थ्यकर छैनन् । धेरै विषादीको प्रयोगले ति खादा विभिन्न किसिमका रोगहरु भित्रिरहेका छन् । त्यसैले बजारमा मात्र आश्रति भइरहनु भनेको शरीरलाई रोगी पनि बनाउनु हो । अतःआफ्नै घरबारी, बगैंचा, करेसाबारी, छत, बार्दलीमा किन सागसब्जी नरोप्ने र ?

फोहोरमैलाको व्यबस्थापन
हामीले घरमा सागसब्जी लगाउदा हाम्रो घरको भान्साबाट निस्किने फोहोरलाई पनि व्यबस्थापन गर्न सक्छौ । कुहिने फोहोरलाई मल बनाई तरकारी तथा फूलको बोट विरुवावामा प्रयोग गर्न सकिन्छ ।

सक्रियता

अहिले हामी धेरै अल्छे भएका छौं । टेलिभिजन हेरेर, गफ गरेर, मोवाइल चलाएर घण्टौ बस्छौं ।तर यो शरीरले समुचित श्रम गर्नुपर्छ । शरीर समुचित श्रम गर्नकै लागि हो । शरीर सक्रिय र चलायमान हुनुपर्छ । यदि हामीले घर अगाडि, पछाडि, छतमा, बार्दलीमा सागसब्जी वा फलफूल लगाएका छौं भने हाम्रो सक्रियता स्वत बढ्छ । हामी गोडमेल गर्न थाल्छौं, सिंचाई गर्न थाल्छौं, स्यहारसुसार गर्न थाल्छौं । यावत् गतिविधिले हाम्रो शारीरिक सक्रियता बढ्छ । अतिरिक्त व्यायामको खाँचो हुँदैन ।

प्रकृतिसँग नजिक

अमेरीकाको एक अध्ययनले वताएकोछ प्रकृति स्ाँग हाम्रो स्र्पश हुँदा शरीरले सकारात्मक उर्जा प्राप्त गर्छ । तपाईं माटोको सम्पर्कमा रहनुहुन्छ । पानी खेलाउनुहुन्छ । मल तयार गर्नुहुन्छ । विरुवा, बुट्यान, फूलहरुसँग रमाउन थाल्नुहुन्छ । वास्तवमा तपाईं प्रकृतिको नजिक पुग्नुहुन्छ । प्रकृतिसँग जति निकट हुन सकिन्छ, खुसी र स्वस्थ्य रहन सकिन्छ । प्रकृतिले हामीलाई रमाउन सिकाउँछ, बाँच्न सिकाउँछ ।

तनाव हट्छ र खुसी प्राप्त हुन्छ

सागसब्जी रोप्ने, फलफूल लगाउने, फलाउने आदि कामले तपाईंलाई तनावबाट टाढा राख्छ । अहिले हामी तनावग्रसत छौं । चारैतिर तनावले घेरिएका छौं । तनावकै कारण हामीलाई अनेक किसिमको रोग लाग्न थालेको छ । तनाव हटाउनका लागि यो राम्रो तरीका हो ।

बगैंचाका यावत् गतिविधिले हामीलाई खुसी पनि तुल्याउँछ । वास्तवमा यी सबै खुसीका स्रोत हुन् । जब तपाईं सागसब्जी, फलफूल लगाउनुहुन्छ, हुर्काउनुहुन्छ तपाईंको ध्यान त्यसमै मग्न हुन्छ । तपाईंमा नकारात्मक विचार आउँदैन । मन अन्यत्र भड्किदैन । आफुले गरिरहेको खेतीपातीमै तपाईं मग्न हुनुहुन्छ । यसले तपाईंको चित्त शान्त रहन्छ ।

तपाईंले रोपेका सागसब्जी उम्रन थाल्छन्, कोपिला लाग्न थाल्छ, फूल फुल्न थाल्छ, फल लाग्न थाल्छ । सागसब्जी हुर्कन थाल्छ । यी सबैकुरा ख्याल गरिरहँदा तपाईंमा एक किसिमको उत्साह पनि जाग्छ । आफुले रोपेका सागसब्जी, फलफूल उम्रिएको र फलेको देख्दा तपाईं प्रफुल्लित रहनुहुन्छ ।