डेंगुबाट बच्न धादिङमा सतर्कता अभियान
नारीकोसिस डटकम/जेठ १३, धादिङ । डेंगु रोगको संक्रमण फैलिन नदिन धादिङमा सतर्कता अभियान सञ्चालन गरिएको छ ।
केही वर्षदेखि महामारीका रूपमा देखापरेको डेंगु रोग नियन्त्रणका लागि यस वर्ष बेलैमा अभियान सञ्चालन गरिएको हो ।
अभियान अन्तर्गत नीलकण्ठ नगरपालिकाको समन्वयमा स्वास्थ्य सेवा विभाग इपिडिमियोलोजी तथा रोग नियन्त्रण महाशाखाले स्वास्थ्य संस्था, टोलसुधार समिति,
सञ्चारकर्मी लगायत सरोकारवालाबीच छलफल गरेको छ ।
लामखुट्टेको टोकाइबाट लाग्ने डेंगुको अहिलेसम्म उपचारको पहिचान भएको छैन। तापनि न्यूनीकरण गर्न र रोग फैलिन नदिन डेंगु रोगसम्बन्धी स्थानीय तहमा अभिमुखीकरण कार्यक्रम गरिएको महाशाखाका भेक्टर कन्ट्रोल निरीक्षक उत्तम प्याकुरेलले बताए ।
लामखुट्टेको टोकाइबाट सर्ने यस रोगबाट बच्न बेलैमा सजकता अपनाउन जरुरी छ उनले भने, ‘डेंगुको विषाणुद्धारा संक्रमित एडिस एजिप्टाई जातको पोथी लामखुट्टेले यो रोग सार्छ।’
डेंगु लागेपछि ज्वरो आउने, टाउको दुख्ने, जोर्नी दुख्ने, गिजाबाट रगत आउने, उल्टी हुने, छालामा रगतको धब्बा देखिनेलगायत लक्षण देखिन्छन्। रोगबाट बच्न लामखुट्टेको टोकाइबाट जोगिने, लामखुट्टेका लार्भा बढ्न नदिने, वरिपरि पानी जम्न नदिने, पानी ढाकेर राख्नेलगायत उपाय अपनाउन स्वास्थ्यकर्मीले सल्लाह दिएका छन्।
तपाईको प्रतिक्रिया