कागेश्वरी मनोहरा नगरपालिका वडा नम्वर ९ को २ वर्ष कार्यकालमा भएको कार्यविवरण सार्वजनिक

नारीकोसिस डटकम/रमिला तामाङ/जेठ २३, काठमाडौं । कागेश्वरी मनोहरा नगरपालिका वडा नम्वर ९ ले स्थानीय तहको निर्वाचन सम्पन्न भएपश्चात भए गरेका कार्य विवरण सार्वजनिक गरिएको छ ।

स्थानीय जनप्रतिनिधिहरुले आफूहरु निर्वाचित भएर आएको २ वर्षको कार्यकाल अवधिमा के कति विकास निर्माणका कार्यहरु गरे भन्ने विषयमा वडाले विहिवार काँडाघारीमा एक कार्यक्रम आयोजना गरी सो कार्य विवरण सार्वजनिक गरेको हो ।

सो कार्यक्रममा सोही वडाका वडा अध्यक्ष कुन्दन खड्काले आफ्नो कार्यकालमा गरिएका कार्यविवरण प्रस्तुत गर्नुभएको हो । वडा अध्यक्ष खड्काले नगरस्तरीय योजनाहरु कहाँ के -कति बजेटको खर्च तथा विकास निर्माणकार्य भयो भन्ने विविध विषयमा कार्यविवरण तथा बजेटबारे प्रस्तुत गर्नु भएको थियो ।

यसै प्रसंगलाई जोड्दै नगर प्रमुख कृष्णहरी थापाले नगरपालिकाले शिक्षा, स्वास्थ्य, सरसफाई, सुरक्षित खानेपानी, सडक लगाएत विविध कार्यहरुलाई बजेट छुट्याउने र संविधानले दिएको नियम अनुसार जनगणना,मेट्रिक प्रणाली अनुसार घर–घरमा नम्बर प्लेट राख्ने कार्य जारी रहेको बताउनुभयो । साथै यी कार्यहरुलाई अझ कसरी चुस्त दुररुस्त तथा गुणस्तरिय ढङ्गले अगाडि वढाउन सकिन्छ भन्ने तर्फ निर्वाचित जनप्रतिनिधिहरु अघि वढिरहेको नगर प्रमुख थापाको भनाई थियो । साथै उहाँले नगरपालिकाले विकास निर्माणलाई गति दिन अझै के गर्नुपर्छ भन्ने विषयमा सल्लाह सुझाव दिन स्थानीय जनताहरुलाई आग्रह गर्नुभएको छ ।

उक्त कार्यक्रममा टोल सुधार समितिका प्रतिनिधिहरु, विभिन्न संकायका कर्मचारीहरु लगायत नगरवासीहरुको सहभागिता रहेको थियो ।

सहभागीहरुले नगरपालिकामा जति पनि भए गरेका विकास निर्माणका कार्यहरुले प्रत्यक्ष परिवर्तनको अनुभूति दिएता पनि केही समस्याहरुको समाधान नभएको गुनासो तथा सुझाव दिएका छन्।  महिला समूहको बैठक बस्नुपर्दा सडकमा बस्नुपर्ने स्थितिरहेकाले नगरपालिका वा वडाले सार्वजनिक जग्गा  छुट्याई दिएमा भवन बनाउन सहज हुने भन्दै सार्वजनिक जग्गा उपलब्ध गराउन स्थानीय महिला समूहका प्रतिनिहरुले माग गरेका छन् । यसै गरि खानेपानी समस्या लगायत विभिन्न समस्याको विषयमा सहभागीहरुले प्रश्न, जिज्ञासा राखेका थिए ।

स्थानीय तहमा जनप्रतिनिधिहरु निर्वाचित भएर आएपश्चात स्थानीय जनताले विकासको अनुभूति भने गरेको देखिन्छ । तर अझै स्थानीय जनताको समस्या पूर्णरुपमा समाधान गर्न जनप्रतिनिधिहरुले विकास निर्माण कार्यलाई ब्यस्थित ढंगले नेतृत्व गरिदिएमा स्थानिय जनता लाभान्वित हुने बताउछन्  ।