यसरी समय व्यवस्थापन गरेर पढ्दा विद्यार्थीले ल्याउन सक्छन् राम्रो नतिजा

विद्यार्थीहरुको लागि समय व्यवस्थापन गर्नु चुनौतीपूर्ण काम हो । तर, केही सामान्य उपाय अपनाएर विद्यार्थीहरुले आफ्नो समयलाई सजिलै व्यवस्थापन गर्न सक्छन् । जसमध्ये केही उल्लेख गरिएको छ ।

राती धेरै लामो समयसम्म बसेर नपढ्नुहोस् । यसो गर्दा बिहान छिटो उठ्न सकिदैन र आफूले सोचे अनुसार काम गर्न सकिदैन । दिमाग फ्रेस पनि रहँदैन । त्यसैले हरेक दिन बिहान छिटै उठ्नुहोस् र केही समय शारीरिक अभ्यास अथवा योगा गर्नुहोस् ।

त्यो दिनभर आफूले पढ्ने विषय र गर्नुपर्ने कामहरु टिपोट गर्नुहोस् । कामको प्राथमिकतालाई छुट्टाउनुहोस् । पढ्दा पनि प्राथमिकता कुन विषयलाई दिने भनेर समय छुट्टाउनुहोस् । गाह्रो लाग्ने समयको लागि अलि बढी समय दिनुहोस् ।

एकोहोरो पढ्ने नगर्नुहोस् । समयतालिका बनाउँदा पनि आराम तथा मनोरंजनको लागि पनि केही समय छुट्टाउनुहोस् । यसरी पढ्दा दिमाग थाक्दैन र स्मरणशक्ति बढ्छ ।

तालिका अनुसार विषय परिवर्तन गरेर पढ्दा आफ्नो दिमागलाई केही मिनेट आराम दिएर नयाँ विषयको लागि तयार हुनुहोस् । यसो गर्दा दिमागमा पूरानो विषय र नयाँ विषयका कुराहरु जुध्दैनन्, सम्झन सजिलो हुन्छ ।

पढ्ने समयमा मोबाइलको नोटिफिकेसन बन्द गर्नुहोस् । हल्ला नहुने ठाउँमा बसेर पढ्नुहोस् । यसो गर्दा थोरै समयमा पढ्नुपर्ने धेरै सिक्न सकिन्छ ।

हल्का र पोषणयुक्त खाना खानुहोस् । खानामा असन्तुलन भयो भने अल्छीपना बढ्ने, बिरामी हुने जस्ता समस्या आउँछन्, जसले गर्दा आफ्नो समय तालिका सबै बिग्रिन्छ ।

बिदाको दिनमा आफ्ना व्यक्तिगत कामहरु सक्ने प्रयास गर्नुहोस् । जसले गर्दा त्यो हप्ताभरी अनावश्यक हुँदनै ।

आफ्ना रुचिका विषय जस्तै पेन्टिङ, नृत्य गायन, लेखन आदिको लागि पनि आफ्नो एक हप्ताको तालिकामा समावेश गर्नुहोस् । यसले गर्दा तपाईको दिमाग र शरीर दुवै स्फूर्त रहिरहन्छ ।

सधैं सकारात्मक सोच भएका व्यक्तिहरुको संगत गर्नुहोस् । संगतले व्यक्तिको जीवनमा धेरै प्रभाव पार्छ । गलत संगतमा पर्नुभयो भने तपाईको समय तालिका मात्र नभएर तपाईको जीवनको समय रेखा नै अस्तव्यस्त हुनसक्छ ।