भक्तपुर क्यान्सर अस्पतालमा श्रम शोषण

नारीकोसिस डटकम/असार १, काठमाडौँ । भक्तपुर क्यान्सर अस्पतालका सरसफाई मजदुरहरुले आफूमाथि श्रम शोषण हुने गरेको गुनासो गरेका छन् । वार्षिक ७० देखि ८० हजार विरामीको उपचार गर्न आउने अस्पतालमा विगत चार वर्षयता भरोसा सर्भिसेज प्रालिमार्फत सफाइ कर्मचारी नियुक्ति गरिँदै आएको छ ।

अस्पतालमा सफाइ मजदुर नियुक्ति गर्न प्रत्येक वर्ष नयाँ कम्पनी छनोट गर्नुपर्ने भएपनि विगत चार बर्षयता एउटै कम्पनीले सफाइ कर्मचारी नियुक्ति गरेर लामो समयदेखि उनीहरुको श्रम शोषण गरिरहेको पीडितहरुले बताएका छन् ।

स्रोतका अनुसार भरोसाले एक तहका सफाइ कर्मचारीको तलव अस्पतालबाट प्रतिव्यक्ति २६ हजार लिने गर्छ । तर, सफाई कर्मचारीलाई भने १३ हजार ५ सय मात्रै दिने गरेको छ ।

भरोसामार्फत अस्पतालमा ५० जना सफाइ कर्मचारी कर्यरत छन् । अचम्मको कुरा त के छ भने कर्मचारी सप्लाई गर्ने उक्त कम्पनीका सञ्चालक नेपाल अर्बुद रोग निवारण संस्थाका महासचिव विमल होडा हुन् । उनै होडा भक्तपुर क्यान्सर अस्पताल व्यवस्थापन समितिका सक्रिय सदस्य समेत रहेका छन् ।

होडा र भक्तपुर क्यान्सर अस्पताल व्यवस्थापन समितिका अध्यक्ष लोकेन्द्र कुमार श्रेष्ठ र होडाबीचको साँठगाँठमा सफाई कर्मचारी नियुक्त गर्ने गरिएको पीडितमध्येका एक सफाई कर्मचारीले बताएका छन् ।