आफ्नो लागि उपयुक्त करियरको छनोट कसरी गर्ने ? ७ टिप्स

करियरलाई हाम्रो समाजमा फेशनको रुपमा लिने चलन छ । तर करियर भनेको फेशन, सामाजिक दबाब या साथीको लहैलहैमा लागेर छनोट गर्ने विषय होइन । प्रत्येक व्यक्तिको छुट्टाछुट्टै क्षमतमा र विशेषता फरक हुने हुनाले तपाईको साथीको लागि उपयुक्त करियर, तपाईको लागि उपयुक्त नहुन सक्छ । करियरले तपाईको भविष्य बोकेको हुन्छ, त्यसैले करियर छनोट गर्दा सोचविचार साथ गर्नुपर्छ ।

सबैभन्दा पहिले त आफूलाई चिन्नुहोस् । तपाईमा के कुरामा रुची छ ? के काम गर्दा तपाईलाई भित्रदेखि खुशी लाग्छ ? स्कूलमा तपाईलाई कुन विषय पढ्दा सबैभन्दा रमाइलो लाग्छ र कुन विषयमा तपाईले राम्रो गर्नुभएको छ ? तपाई खाली बसिरहेको समयमा कस्ता कुराहरु दिमगमा खेलाउनुहुन्छ ? यी सबै प्रश्नको उत्तर खोज्नुहोस् ।

जब तपाईले ती उत्तरहरु भेट्नुहुन्छ, ती उत्तरहरु विभिन्न पेशा वा क्षेत्रसँग सम्बन्धित हुन सक्छन् । ती पेशा वा क्षेत्र के – के हुन् र कस्ता – कस्ता काम हुन्छन् त्यो खोज्नुहोस् ।

शिक्षक, आफ्ना अभिभावक, आफूभन्दा माथिल्लो शौक्षिक तहका व्यक्तिहरुलाई आफ्ना रुचि बारे बताउनुहोस्, उनीहरुबाट विभिन्न पेशाको बारेमा बुझ्नुहोस् र आफ्नो लागि उनीहरुबाट सुझाव लिनुहोस् ।

अब आफूबाट निस्केका ती पहिलेक उत्तरहरु।, ती पेशा तथा क्षेत्रको बारेमा मिलेका जानकारीहरु र अरुले दिएका सल्लाह बिच मूल्यांकन गरेर हेर्नुहोस् र तपाईलाई कु्न – कुन क्षेत्र मन पर्यो ? कुन – कुन काम तपाईको रुचि अनुसार परे, ती काम वा क्षेत्रको छोटो सूचि बनाउनुहोस् ।

त्यसपछि ती सूचीमा आएका क्षेत्र वा पेशाको बारेमा विस्तृत बुझ्नुहोस् । ती क्षेत्रमा सफलता हासिल गर्नको लागि आवश्यक योग्यता, क्षमता बुझ्नुहोस् । उक्त क्षेत्रको करियरको लागि आधारभूत कुराहरु के – के हुन्, छुट्टाउनुहोस् । त्यसबाट कसरी अगाडी बढ्न सकिन्छ, त्यसमा लाग्ने समयवाधि, मेहनत  के कति हो, त्यसबाट तपाईले भविष्यमा आफूलाई कुन पदमा लेख्न सक्नुहुन्छ, तपाईको जीवनको लक्ष्य, त्यो करियरले पूरा गर्न सक्छ कि सक्दैन आदि सबै जानकारीहरु लिनुहोस् ।

यसरी ती सबै क्षेत्रको जानकारी लिएपछि, आफ्नो लागि उपयुक्त हुने करियर छनोट गर्नुहोस् । अब त्यो करियरमा सफलता हासिल गर्नको लागि करियरको एउटा लक्ष्य निर्धारण गर्नुहोस् ।

करियरको लक्ष्य निर्धारण गरिसकेपछि, अगाडी बढ्नको लागि के – के गर्नुपर्छ, त्यही आधारमा आफ्ना योजनाहरु बनाउनुहोस् ।