सेनाको टोली लिएर हेलिकप्टर संखुवासभामा

नारीकोसिस डटकम/असार १६, काठमाडौं । संखुवासभामा सुरक्षाका लागि गस्तीमा रहेको प्रहरी टोली र नेत्र विक्रम चन्द विप्लव नेतृत्वको नेकपाका कार्यकर्ताबीच दोहोरो गोली हानाहान भएपछि थप टोली लिएर नेपाली सेनाको हेलिकप्टर गएको छ।

सोमबार बिहान करिब साढे ९ बजे सिलिचोङ गाउँपालिका–१ ह्वाङलामा दुबैपक्षबीच गोली हानाहान भएपछि थप टोली लिएर सेनाको हेलिकप्टर संखुवासभा गएको हो।

सहायक प्रहरी निरिक्षक उमेष थापाको कमाण्डमा १५ र नेपाल प्रहरीको प्रहरी सहायक निरिक्षकको कमाण्डमा १० जनाको टोलि लिएर काठमाडौंबाट नेपाली सेनाको एमआई १७ हेलिकप्टर दिउँसो १२ बजे गएको हो।

सुरक्षा निकायले दिएको जानकारी अनुसार दिउँसो १२:१५ बजे नेपाली सेनाको एमआई १७ हेलिकप्टरद्धारा प्रहरी निरिक्षक शेखरजंग मल्लको कमाण्डमा २५ जनाको टोली गएको हो।

त्यस्तै दिउँसो १ः ४० बजे वाङ्ला भन्ने स्थानमा एउटा हेलिकप्टर ल्याण्ड भएको र दिउँसो २ः०५ बजे सोही स्थानमा अर्को हेलिकप्टर ल्याण्ड गरी प्रहरी कमाण्डहरुलाई झारेर हेलिकप्टर विराटनगर गएको हो।

संखुवासभा प्रहरी कार्यालयका प्रमुख डिएसपी मिमबहादुर लामाले पुष्टि गरेका छन्। सशस्त्र प्रहरी र नेपाल प्रहरीको संयुक्त गस्तीमा रहेको १९ जनाको प्रहरी टोलीमाथि विप्लवका कार्यकर्ताले गोली चलाएपछि प्रहरीले जवाफी फाइरिङ गरेको प्रमुख जिल्ला अधिकारी जीवनप्रसाद दुलालले बताए ।