बाजुरामा प्रहरीमाथि हातपात गर्ने एक महिलासहित पाँच कर्मचारी पक्राउ

नारीकोसिस डटकम/भदौ २९, बाजुरा । डिउटीमा खटिरहेका प्रहरीमाथि मदिरा सेवन गरी हातपात गर्ने एक जना महिला सहित पाँच जनालाई प्रहरीले नियन्त्रणमा लिएको छ ।

प्रहरीले राष्ट्रिय बाणिज्य बैंक शाखा बाजुरामा कार्यरत अमृत बोहरा, केशव गिरी, सरकारी वकील कार्यालयका कार्यालय सहयोगी हरिशंकर जोशी, बडिमालिका नगरपालिका ८ का गोरख थापा र सोही वडाकी तथा मेरिस्टोप इन्टरनेशनल नामक गैर सरकारी सस्थामा कार्यरत अनमी धनी थापालाई नियन्त्रमा लिई हिरासतमा राखिएको प्रहरी निरीक्षक जनक ढुंगानाले बताएका छन्।

घाइते प्रहरी सहायक निरीक्षक चन्दको गालाको दाहिने भागको अनुहारको हड्डीमा गम्भीर चोट लागेको थियो। जिल्ला अस्पताल बाजुरामा उपचार सम्भव नभएकाले जिल्ला बाहिर रिफर गरिएको जिल्ला अस्पताल बाजुराले जानकारी दिएको छ।

पक्राउ गरिएका पाँच जनामामाथि अनुसन्धान भइरहेको र कारवाही प्रक्रिया अघि बढाउने तयारी प्रहरीले गरेको छ। बडिमालिका ८ डाँडामा भदौ २७ गतेबाट अनन्ते मेला लागेको छ ।तीन दिनसम्म चल्ने मेला रातिको समयमा पनि लाग्ने गरेको छ।

मेलालाई सौभार्द र शान्त बनाउन बडिमालिका नगरपालिका र जिल्लाका सरोकारवालाहरुको बैठक बसी अनन्ते मेला अबधिभर रक्सी बेच्न र खान प्रतिबन्द गरीएको निर्णय छ। मेला अवधिभरमा बेच्नेलाई पाँच हजार र खाएको भेटाए पच्चीस सय जरीवान तोकिएकको छ।