उपनिर्वाचनः स्थानीय तहको मनोनयन दर्ता आज हुँदै

नारीकोसिस डटकम/कात्तिक २७, काठमाडौं । आगामी मंसीर १४ गते हुन लागेको उपनिर्वाचनका लागि आज स्थानीय तहहरुमा प्रमुख तथा वडा अध्यक्ष पदका लागि उम्मेदवारी दर्ता हुँदैछ ।

निर्वाचन आयोगले बिहान १० देखि दिउँसो १ बजेसम्म मुख्य र निर्वाचन अधिकृतको कार्यालयमा उम्मेदवारको मनोनयनपत्र दर्ता गर्ने कार्यक्रम रहेको जनाएको छ ।

स्थानीय तहको उपनिर्वाचनका लागि मुख्य र निर्वाचन अधिकृतको कार्यालय सम्बन्धित स्थानीय तहको केन्द्रमा यहीँ कात्तिक २० गते स्थापना भइसकेको छ ।

स्थानीय तहको उपनिर्वाचन अन्तर्गत १ उपमहानगरपालिका प्रमुख, ३ गाउँपालिका अध्यक्ष, १ उपाध्यक्ष र ४३ वडाध्यक्षका लागि मतदान हुँदैछ । प्रतिनिधिसभाका १ र प्रदेशसभाका ३ सदस्यका लागि २१ कात्तिकमै उम्मेदवारहरुको मनोनयन दर्ता भइसकेको छ। ३७ जिल्लामा रिक्त ५२ पदमा उपनिर्वाचन हुँदै छ। जहाँ ४ लाख ५४ हजार ११४ जना मतदाता रहेका छन् ।