गर्भवती तथा सुत्केरी आमाहरुलाई अण्डा र झण्डा वितरण

नारीकोसिस डटकम/पुस २, काठमाडौं । बझाङ जिल्लाको साईपाल गाँउपालिकामा गर्भवती तथा सुत्केरी आमाहरुका लागि गाँउपालिकाले अण्डा र झण्डा वितरण गरेको छ ।

आमा सुरक्षा कार्यक्रमअन्तर्गत गाँउपालिकाको आर्थिक सहयोगमा गाँउपालिकाका गर्भवती तथा सुत्केरी महिलालाई गर्भ जाँच गराए बापत र स्वास्थ्य संस्थामा सुत्केरी भए बापत कुखुराको अण्डासँगै आयोडीनयुक्त नुन वितरण कार्यक्रम गरेको हो ।

गाँउपालिकाका सबै सुत्केरी तथा गर्भवती महिलाहरु स्वास्थ्य संस्थामा सुत्केरी गराउन नआउने परिपाटीको अन्त्य गर्ने र आमा र शिशुको स्वास्थ्य स्वस्थ राख्ने उदेश्यले सो कार्यक्रम तय गरिएको साईपाल गाँउपालिकाका स्वास्थ्य संयोजक लोकेन्द्र जेठाराले जानकारी दिनुभयो।

गर्भावस्थामा ४ पटक चेकजाँच गराए बापत पटकै पिच्छे ६ वटा अण्डाका दरले वितरण गर्ने र सुत्केरी भएको बेला पाँच वटा अण्डा, सुत्केरी भएको तीन दिन र एक हप्तापछि पुन चेक जाँच गराए वापत ५ ५ वटा अण्डाका दरले स्वास्थ्य संस्थाबाट उपलब्ध गराउने गरिएको छ ।

गर्भ जाँचदेखि सुत्केरी भएसम्म एक महिलाले ३९ अण्डा पाउने ब्यावस्था छ । यसरी स्वास्थ्य संस्थामा अण्डा उपलब्ध गराउन थालेपछि गर्भ जाँच गराउनेको संख्यामा वृद्धि भएको छ ।