सार्वजनिक सवारी साधनमा ट्राफिक प्रहरीको अनुगमन

नारीकोसिस डटकम/पुस २५, काठमाडौं । महानगरिय ट्राफिक प्रहरी महाशाखाले सार्वजनिक सवारी साधनमा अनुगमन सुरु गरेको छ ।

प्रहरी महाशाखाका प्रमुख प्रहरी वरिष्ठ उपरीक्षक भिम प्रसाद ढकाल तथा अनुगमन समितिका पदाधिकारीसहतिको टोलीले सार्वजनिक सवारी साधनको अनुगमन सुरु गरेको हो ।

शुक्रबार सुन्धारामा २३ वटा भाडाका सार्वजनिक सवारीमा अनुगमन गरिएको महाशाखाले जनाएको छ ।

अनुगमनका क्रममा भाडाका सार्वजनिक सवारी तथा चालकमा देखिएका कमिकमजोरीलाई सच्याउनको लागि चालकलाई प्रतिबद्धता पत्र समेत प्रदान गरिएको छ ।

सवारी दुर्घटना न्यूनीकरण र सहज ट्राफिक व्यवस्थापनका लागि चालकहरु व्यवसायिक, अनुशासित र दक्षताका साथ आफुलाई उदाहरणीय बनाउँदै चालक प्रतिको बिश्वासमा बृद्धि गर्न समेत उनीहरुलाई अनुरोध गरिएको उपरीक्षक भिम प्रसाद ढकालले बताउनुभयो ।