बालबालिकालाई स्मार्टफोनको लतबाट जोगाउनुहोस्

नारी कोसिस डटकम । एक्काइसऔं शताब्दीमा नयाँ प्रविधिको विकाससँगै मान्छेहरूको आर्दश, दैनिकी तथा स्वभावमा निकै परिर्वतन आएको देख्न सकिन्छ । हरेक कुराको फाइदा सँगसँगै बेफाइदाहरू पनि हुने गर्दछन् ।

नयाँ डिजिटलको उत्पादन र सेवाहरूको विकास तीव्र गतिमा भइरहँदा हामीहरूलाई निकै सजिलो पनि भएको छ । सबैको हातहातमा अहिले मोबाइल छ, जसको कारण परिवारहरू एक अर्कासँग टाढिँदै गइरहेका छन् । आजकल बच्चाहरूलाई व्यस्त राख्ने वा फकाउने सबैभन्दा सजिलो उपाय ट्याबलेट र स्मार्टफोनको प्रयोग गरेको देखिन सकिन्छ । महत्त्वपूर्ण काममा व्यस्त हुनुपर्दा होस् या रोएको बेलामा फकाउन होस् अभिभावकहरूले मोबाईल दिएर बच्चालाई भुलाउने गर्दछन् । यसले बच्चाहरूमा विभिन्न समस्याहरू देखिन थालेको छ । उनीहरूमा घाँटी र आँखाको समस्या देखिने गरेको छ । यसका साथै स्मार्टफोन वा ट्याब्लेट जस्ता ग्याजेटको धेरे प्रयोगले बच्चाहरू एकोहोरो हुने, जिद्दी हुने तथा छिट्टै रिसाउने बानी लाग्दै आएका छन् । अभिभावकले खाना खाँदा, पढ्दा वा सुत्ने बेलामा ग्याजेटबाट टाढा राखेर आफ्नो बालबालिकाका हरेक क्रियाकलापमा सधैँ निगरानी राख्नुपर्छ । बच्चाहरुले देखेर सिक्ने गर्दछन् त्यसै कारणले अभिभावकले पनि सकेसम्म साना बच्चाको अगाडि आफू त्यस्ता ग्याजेटमा व्यस्त रहने गर्नुहुँदैन ।

अध्ययन अनुसार १३ वर्षमुनिका बच्चाहरू नयाँ प्रविधिको धेरै नजिक छन् ।दुई वर्षभन्दा कम उमेरका बच्चाहरूखलाई कुनै पनि प्रविधिको प्रयोग नगराउन तथा त्यो भन्दा माथिका बच्चाहरूलाई दिनको दुई घण्टामात्र प्रविधिको प्रयोग गर्न चिकित्सकहरू आग्रह गरेका छन् । साथै बच्चाहरूलाई स्मार्टफोन र ट्याब्लेटको संसारबाहिर सामाजिक अन्र्तक्रियामा बढी सहभागी हुन जोड दिनुपर्ने उनीहरूको आग्रह छ ।