चिया उद्योगी र मजदुरबीच ३ बुँदे सहमतिपछि आन्दोलन फिर्ता
नारीकोसिस डटकम/वैशाख ३१, भद्रपुर । नेपाल चिया उत्पादक संघले श्रम ऐन र नियमावलीमा व्यवस्था भएबमोजिम पारिश्रमिक दिने लिखित सहमति गरेपछि चिया मजदुरले आन्दोलन फिर्ता लिएका छन् ।
४४ दिनदेखि बन्द रहेका मुलुकभरका चिया बगान र कारखाना मंगलबारबाट सुचारु हुने भएका छन् । सोमबार साँझ चिया मजदुर र उद्यमीबीच तीन बुँदे सहमति पछि ५० हजार मजदुर आन्दोलन स्थगित गरी काममा फर्किने अखिल नेपाल टेड युनियन महासंघले जनाएको छ ।
महासंघ प्रदेश १ का प्रमुख भुपाल सापकोटाका अनुसार सरकारले ३१ साउन २०७५ मा राजपत्रमा प्रकाशन गरेको चिया बगान तथा कारखानामा कार्यरत मजदुरका लागि न्यूनतम पारिश्रमिक आधारभूत तलब २३१ , महँगी भत्ता १५४ र कारखानामा काम गर्ने नाइके तथा चौकीदारको ४२ रुपैयाँ अतिरिक्त भत्ता २०७६ को चैत्र मसान्तसम्ममा उपलव्ध गराउने सहमति भएको छ ।
त्यसैगरी श्रम ऐन, २०७४ तथा श्रम नियमावली, २०७५ मा भएको व्यवस्था नेपाल चिया उत्पादक संघमा आबद्ध चिया बगान तथा कारखानामा कार्यान्वयन गर्ने र मंगलबारबाट मजदुरले सबै आन्दोलन स्थगित गरी काममा फर्किने सहमति भएको छ ।
अब चिया मजदुरहरूले पाउने भए पनि सामाजिक सुरक्षा कोष भने लागू नगरिएको चिया उत्पादक संघका सल्लाहकार चण्डी पराजुलीले बताए । दैनिक ३८५ रुपैयाँ पाउनुपर्ने माग गर्दै सडक आन्दोलनमा उत्रिएका ५० हजार मजदुर र सिजनल झन्डै १ लाख मजदुर मंगलबारदेखि काममा फर्किने सहमतिमा सबै मजदुर संघसंगठनका प्रतिनिधिले हस्ताक्षर गरेका छन् ।
तपाईको प्रतिक्रिया