रसुवामा टाटासुमो दुर्घटना हुँदा एकै परिवारको तीनको मृत्यु, पाँच घाइते

नारीकोसिस डटकम/जेठ २१, रसुवा । रसुवा स्थित मैलुङ स्याफ्रुबेसी सडक खण्डमा सोमबार साँझ टाटासुमो दुर्घटना हुँदा एकै परिवारको तीन जनाको मृत्यु भएको छ । पाँच जना घाइते भएका छन् ।

निर्माणाधीन सडक खण्ड अन्तरगत रसुवाको कालिका गाउँपालिका–१ गुम्चेतमा भएको बा १० च ५८२० नम्बरको टाटसुमो दुर्घटनामा दुई जनाको घटनास्थलमा र एक जनाको उपचारको लागि अस्पताल लैजादै गर्दा बाटोमा मृत्यु भएको प्रहरीले जनाएको छ ।

मृत्यु हुनेमा रसुवाको आमा–छोदिङ्बो गाउँपालिका वडा नं ४ गोल्जुङका ३४ वर्षीया मेन्दो घले, ३२ वर्षीया साइली घले र २९ वर्षीय नुर्बु तामाङ रहेको रसुवाका प्रहरी प्रमुख प्रहरी नायब उपरीक्षक भागेन्द्र ढकालले जानकारी दिए ।

दुर्घटनामा परेर घाइते हुनेमा २९ वर्षीया योङजोेङ तामाङ र उहाँको छोरा पाँच वर्षीय वाङ्जोङ तामाङ, तीन वर्षीय बालक निमा छेवाङ तामाङ, ३५ वर्षीया देउरानी तामाङ र गाडीका चालक ३० वर्षीय निमाकामी घले रहेका छन् । उनीहरुको अबस्था गम्भीर रहेकाले जिल्ला अस्पताल त्रिशूलीमा उपचार हुन नसकेपछि सोमबार राति नै काठमाडौ पठाइएको नुवाकोट प्रहरीले जनाएको छ ।

प्रहरीको अनुसार एउटै परिवारका सदस्य रहेका उनीहरु पोखरा स्थित गुम्बामा अध्ययनको लागि राखेको बच्चासंग भेट गरेर घरतर्फ फर्कदै गरेको समयमा सोमबार साझ साढे ६ बजे दुर्घटनामा परेका हुन् ।

निर्माण भइरहेको कच्ची सडकमा रातको समयमा तिव्र गतिमा चलाएकाले अनियन्त्रित भएर गाडी दुर्घटनामा परेको हुनसक्ने प्रहरीले जनाएको छ ।