यी भ्रमहरु जसले तपाईलाई अगाडी बढ्नबाट रोकिरहेका छन्

हामी धेरैजसो समय भ्रममै बाँचिरहेका हुन्छौं । ती भ्रमहरुले हामीलाई खुलेर बाँच्नबाट रोकिरहेका हुन्छन् । हाम्रो गतीमा अवरोध बनेर खडा भैरहेका हुन्छन् । भ्रमहरुलाई चिर्नुहोस्, खुलेर बाँच्नुहोस्, आफ्नो गतीलाई लय दिनुहोस् ।

यी भ्रमहरु जसले तपाईलाई अगाडी बढ्न रोकिरहेका छन् :

म केही गर्न चाहान्छु, तर बाटो पाइरहेको छैन:
हामी मध्ये अधिकांश केही गर्ने सोचमा छौं, तर केही गरिरहेका भने छैनौं । आफूले भनेजस्तो काम पाइएन, भनेजस्तो वातावरण छैन या यस्तै अनेक बाहनामा हामी यत्तिकै भौंतारिरहेका छौं । तर ठूलो सपना पूरा गर्नको लागि सबैकुरा तपाईले चाहेजस्तो तपाईको अगाडी आउंदैन । आफनो अगाडी जे आउंछ, त्यसलाई आफूले चाहेजस्तो बाटोमा लैजाने हो । केही गर्न चाहेमा खाली नबस्नुहोस्, केही न केही गर्नुहोस् । एकै ठाउँमा उभिएर नबस्नुहोस् । हिड्दै, बाटो बनाउँदै जानुहोस् ।

कम तलबमा काम गर्नु हुँदैन:
पढाइ पूरा गरेपछि हामी जागिर खोज्न हिड्छौं । त्यसक्रममा हामीले जागिर भन्दा पनि तलब कति छ भन्ने कुरालाई महत्व दिन्छौं । तपाईलाई एकै पटक तपाईले चाहे जति तलब कसैले पनि दिंदैन । त्यसैले कैयौं युवाहरु पढाइपछि बेरोजगार भएर बसिरहेका हुन्छन् । यस्तो अवस्थामा तपाई निरासामा पनि जान सक्नुहुन्छ । त्यसैले तपाईले पहिले कामलाई प्राथमिकता दिनुहोस् । जब तपाईको कामको अनुभव बढ्दै जान्छ तपाईको अगाडी थुप्रै अवसरहरु आउन थाल्छन् ।

मसंग स्रोत छैन:
हामी आफूसंग भएका कुरामा भन्दा आफूसंग नभएका कुरामा बढी केन्द्रित हुन्छौं । हामी  दु:खी बन्नुको मुख्य कारण पनि यहि हो । आफूसँग भएका कुराहरुमा केन्द्रित हुनुहोस् । तपाईले ती कुरामा नै आफ्नो लागि स्रोत भेट्नुहुृनेछ । जब ती स्रोतको उपयोग गर्दै अगाडी बढ्नुहुन्छ, तपाईसंग नभएका र तपाईले चाहेका अन्य स्रोत पनि बिस्तारै तपाईसंग आउन थाल्छन् ।

ठूलो काममा हात हालेर घाटा व्यहोर्नु भन्दा सानो काममै रमाएर बस्नु बेस:
एकै वर्ष खाजा पसल संचालन गरेका दुई व्यापारीलाई २० वर्ष पछि हेर्दा एउटा पसलेले खाजा पसललाई केही बढाएर लजसम्म पुगेको हुन्छ भने अर्को पसलले रेष्टुरेन्ट चेनको मालिक बनेको हुन्छ, आफ्नो रेष्टुरेन्टको एउटा ब्रान्ड स्थापित गर्न सफल हुन्छ । त्यसैले डरमा रहेर आफ्नो लक्ष्यलाई सिमित बिन्दुमा रोक्नु हुँदैन । सफलता भनेको एउटा बिन्दु होइन, निरन्तर यात्रा हो । र त्यो यात्रा भित्र घाटा, जोखिम, असफलता सबै मिसिएका हुन्छन् ।