खुसी र सकारात्मक रहने व्यक्तिहरु यी कुरामा अल्झिदैनन्

हरेक व्यक्तिले एक पटक मात्र पाउने जीवनमा कसैले सुन्दर तरिकाले बाँचेर जीवनलाई अमुल्य प्रमाणित गर्छन् भने कसैले जीवनको एउटा मोडमा नै अल्झिएर, बाटो बिराएजस्तो गरी बाँच्छन् र जीवनको रोमाञ्चक यात्राबाट आफूलाई बन्चित गर्छन् ।

खुसी र सकारात्मक रहने व्यक्तिहरु भौतिक कुरा प्राप्तिलाई नै ठूलो मान्दैनन् । उनीहरु आफ्नो लक्ष्यमा अडिग रहन्छन्, तर आफ्नो सफलतालाई तुलना गर्छ भौतिक कुराहरु पाउनुलाई नै ठूलो मान्छ, त्यो व्यक्ति खुसी रहन सक्दैन । खुसी र सकारात्मक रहनको लागि साना साना कुराहरु, नजिकका मान्छेहरुसँग सँगै रहंदाका पलहरु, अरुलाई सहयोग गर्दाका क्षणहरु, कुनै सानो काममा पनि पाएको सफलता, कसैले दिएको सकारात्मक आलोचना नै काफी हुन्छन् ।

खुसी र सकारात्मक रहने व्यक्तिले कहिल्यै पनि आफूलाई अरुसँग तुलना गर्दैनन् । अरुसँग तुलना गर्दा आफूलाई अरु भन्दा तल देख्यो भने व्यक्ति दुखी बन्छ र अरुभन्दा माथी देख्यो भने घमन्डी बन्छ । त्यसैले खुसी र सकारात्मक रहनको लागि यो बानी जतीसक्दो छिटो छोड्नु राम्रो हुन्छ ।

खुसी र सकारात्मक रहने व्यक्तिहरु विगतमा अल्झिएर बस्दैनन् । केही समय तनावमा रहेपनि, उनीहरु त्यो तनावलाई व्यवस्थापन गरेर, अझ परिपक्क बन्दै जीवनमा अगाडी बढ्छन् । जसले गर्दा विगत वा अप्ठ्यारो परिस्थिति, उनीहरुको लागि अगाडी बढ्ने सिंढी बन्न पुग्छ ।

खुसी र सकारात्मक रहने व्यक्तिहरु आफूलाई कमजोर ठानेर, अरुमाथी परनिर्भर बनेर र आफ्नो जिम्मेवारी देखि टाढा भागेर बस्दैनन् । उनीहरु कसैले आफूलाई सहयोग गरेन भने, त्यही कुरामा अल्झिएर, आफूलाई साहाराविहिन ठानेर बस्दैनन् । उनीहरु आत्मनिर्भर बन्न र आफ्नो जिम्मेवारी निर्वाह गर्न मन पराउँछन् । उनीहरु अरुको साथ नपाउनुलाई, आफैले काम गरेर देखाउन पाउने अवसरको रुपमा लिन्छन् ।

खुसी र सकारात्मक रहने व्यक्तिहरु अरुको बारेमा कुरा गरेर बस्दैनन् । उनीहरु काम, कार्यक्रम, लक्ष्य योजनाको बारेमा कुरा गर्छन् । उनीहरु कसैको खुट्टा तान्दैनन् । अरुलाई सहयोग गर्न मन पराउँछन् र आफूले हरेक दिन केही नयाँ कुरा सिक्न मन पराउँछन् ।

खुसी र सकारात्मक रहने व्यक्तिहरु आफूले गरेका कुनै गल्तीमा पछुतो मानेर बसिरहंदैनन् । उनीहरु आफनो गल्तीलाई पाठको रुपमा लिन्छन् र आगामी दिनमा त्यो गल्तीबाट सिकेका पाठलाई प्रयोग गर्दै अगाडी बढ्छन् ।

खुसी र सकारात्मक रहने व्यक्तिहरु कुनै काम बनेन भने उही तरिकामा नै अल्झिएर वा आफूलाई असफल ठानेर बस्दैनन् । उनीहरु आफ्ना कमजोरी खोतल्छन्, सिर्जनात्मक तरिका पत्ता लगाउँछन् र नयाँ तरिकाले कामलाई निरन्तरता दिन्छन् ।