बिजनेस सुरु गर्न चाहनेहरुका लागि सहयोगी टिप्स

आजको युगमा आर्थिक उन्नतिको लागि उद्धमशिलता प्रमुख विकल्प हो । पछिल्लो समयमा उद्धमशिलतातर्फ आकर्षण पनि बढिरहेको छ । यहाँ बिजनेस सुरु गर्न चाहनेहरुका लागि केही टिप्स उल्लेख गरिएको छ

कामलाई सुक्ष्म रुपमा अध्ययन नगरी बिजनेस सुरु नगर्नुहोस् । त्यसैले पहिलो त्यो काम गरेर अनुभव लिनुहोस् । त्यसपछि त्यसका व्यवस्थापकीय पक्षहरु बुज्नुहोस् ।

बिजनेस सुरु गर्दै जाँदा त्यसमा आउने चुनौतीका कारण मानिसहरु निराश हुन्छन् र छोड्छन् । त्यसैले पहिले नै त्यसमा चुनौती के – के छन्, सम्भावित अप्ठ्यारा परिस्थिति कस्ता हुन सक्छन् र उक्त बिजनेसका फाइदा तथा अवसर के हुन् भन्ने राम्रोसँग अध्ययन गर्नुहोस् । बजारमा अध्ययन गर्नुहोस् ।

चुनौतीहरुसँग नडराउनुहोस् । बरु,  आफैंले चुनौतीहरु खडा गर्नुहोस् । जहाँ चुनौती हुँदैन, त्यहाँ प्रगती पनि हुँदैन ।

आफूमाथि विश्वास गर्नुहोस् । अरुका आलोचनालाई सकारात्मक वा नकारात्मक भन्ने छुट्याउनुहोस् । अरुको आलोचनाका कारण आफ्नो सपनामाथि सम्झौता नगर्नुहोस् ।

बिजनेसलाई आवश्यक पूँजी र आफूसँग उपलब्ध हुनसक्ने पूँजीको लेखाजोखा गर्नुहोस् । सफल व्यवसायी वारेन बफेटले भनेका छन्, “नदीमा दुई वटा खुट्टा एकैपटक राख्यौ भने तिमी डुब्न पनि सक्छौ । त्यसैले पहिले एउटा मात्र खुट्टा राखेर विचार गर ।”

आफ्नो कामको लागि टिम बनाउँदा सकारात्मक विचार भएका र विश्वासयोग्य मानिसहरुलाई चुन्नुहोस् । सल्लाह टिमका सबै व्यक्तिको लिनुहोस्, तर निर्णय भने आफैले गर्नुहोस् ।

समय व्यवस्थापन गर्न सिक्नुहोस् । एक सेकेन्डले पनि तपाईको काममा धेरै असर गर्नसक्छ । अनुशासनमा र मेहनतमा विश्वास गर्नुहोस् । तपाई अनुशासनमा बस्नुभयो, मेहनत गर्नुभयो भने तपाई पछाडीका व्यक्तिहरु अनुशासनमा बस्नेछन् र मेहनत गर्नेछन् ।

गल्ती लुकाउन अरुलाई आरोप लगाउने बानी हटाउनुहोस् । साना – साना गल्तीहरुबाट पनि सिक्ने, गल्तीको जिम्मेवारी लिने र तिनलाई नदोहो¥याउने प्रयास गर्नुहोस् ।

कामको सम्मान गर्दै फिल्डमा पनि काम गर्ने र कामलाई सुक्ष्म तरिकाले नियाल्ने बानी बसाल्नुहोस् । हाकिम भएर होइन नेतृत्वकर्ता भएर टिमलाई प्रेरित गर्नुहोस् ।

आर्थिक पक्षको लेखाजोखा तथा व्यवस्थापनमा गम्भीरता देखाउनुहोस् । धेरै बिजनेसहरु आर्थिक अनुशासन नभएका कारण, आर्थिक व्यवस्थापन राम्रो नभएका कारण असफल हुने गर्छन् । बिजनेसमा आएको आम्दानीलाई फजुल खर्च नभई, लगानीको रुपमा प्रयोग गर्नुहोस् ।

छिटो आत्तिने र छिटो खुशी हुने बानी छ भने धैर्य रहन सिक्नुहोस् । बिजनेसमा छिटो धेरै आम्दानी हुँदैन र आज राम्रो आम्दानी भयो भन्दैमा भोली पनि त्यही अनुपातमा आम्दानी हुनेछ भन्ने हुँदैन ।

अरुलाई छिट्टै विश्वास गर्ने बानी छ भने कम गर्नुहोस् । गफ र योजनालाई भन्दा कामलाई बढी महत्व दिनुहोस् ।