आलोचनाबाट डराउनुहुन्छ ? ह्यान्डल गर्नुहोस् आलोचना

मानिसले आलोचनाको डरले आफूलाई गर्न मन लागेको काम पनि हिच्किचाउँछ भने उत्साही रुपले काम गरिरहेको व्यक्ति आलोचनाले हतोत्साही हुनसक्छ । तर आलोचनालाई उपयुक्त तरिकाले लिन सक्ने व्यक्तिले आफ्नो लक्ष्यलाई कहिल्यै छोड्दैन ।

आलोचनालाई हरेक काममा हुन्छ । त्यसैले आलोचनालाई बुझ्नु भन्दा पहिले आफ्नो लक्ष्यलाई आत्मसात गर्नुहोस् । अठोट गर्नुहोस् र आफूमा हिम्मत भर्नुहोस् ।

प्रत्येक व्यक्तिको आ – आफ्नो विचार हुन्छ । कुनै पनि व्यक्तिले आलोचना गर्नु भनेको त्यो व्यक्तिले तपाई वा तपाईको कामप्रति आफ्नो विचार प्रकट गर्नू हो र, तपाईको योजना र लक्ष्य भनेको तपाईको आफ्नो विचारबाट उत्पादन भएको हो । अरुको विचारले गर्दा आफ्नो विचारलाई छायाँमा पर्न नदिनुहोस् ।

आलोचना दुई प्रकारको हुन्छ, सकारात्मक र नकारात्मक सकारात्मक आलोचनाले तपाईमा अझ निखारता आओस् भन्ने चाहेको हुन्छ भने नकारात्मक आलोचना तपाईलाई पछाडि धकेल्नु प्रेरित हुन्छ ।

सकारात्मक आलोचना भनेको तिमीले यसो गरेको भए अझ राम्रो हुन्थ्यो । तिमीले यो भन्नु वा गर्नुको साटो यसो भनेको वा गरको भए हुन्थ्यो जस्तो हुन्छ भने नकारात्मक आलोचना भनेको तिमीले यो गर्नै सक्दैनौ । तिमीले यो काम गरेर कही पुग्दैनौ । त्यो लक्ष्यसम्म पुग्ने तिम्रो क्षमता नै छैन जस्तो भनाइ हो ।

तपाईको कामको बारेमा आलोचना गर्ने व्यक्तिले तपाईले गरिरहेको कामलाई बुझेको छ कि छैन, त्यो सोच्नुहोस् । तपाईको कामलाई नबुझेको व्यक्तिले दिएको आलोचनालाई गम्भीरताका साथ नलिनुहोस् ।

कामलाई बुझेको व्यक्तिले गरेको आलोचना हो भने, त्यो आलोचनाबारे उक्त व्यक्तिसँग र त्यो क्षेत्रको ज्ञान भएका अरु व्यक्तिबाट कुरा गर्नुहोस् र आफ्नो योजना योजना र त्यो आलोचनालाई जोडेर हेर्नुहोस् । आलोचनालाई योजनाको लागि सुझावको रुपमा हेर्नुहोस, लक्ष्य नबदल्नुहोस् ।

तपाईको आलोचना गर्ने व्यक्तिले कस्तो अवस्थामा आलोचना गरेको हो ? उसले रिस वा आवेगमा आएर आलोचना गरेको हो भने, गम्भीर तरिकाले नलिनुहोस् ।

तपाईको काम वा योजनाको आलोचना गरेको व्यक्तिले तपाईको क्षमतालाई कत्तिको बुझेको छ ? तपाईको क्षमतालाई नबुझेको व्यक्तिले दिएको आलोचनालाई आफ्नो क्षमता समाजलाई देखाउनको लागि उत्प्रेरणाको रुपमा लिनुहोस् ।

कुनै पनि आलोचनालाई व्यक्तिगत रुपमा नलिनुहोस् । त्यो आलोचनाको सकारात्मक पक्ष र नकारात्मक पक्षलाई केलाउनुहोस् र सकारात्मक पक्षमा जोड दिनुहोस् ।

सकारात्मक सोच राखेर हेर्नुभयो भने आलोचनाले तपाईलाई निराशमा धकेल्दैन । त्यसले तपाईलाई अगाडी बढ्न प्ररित गर्छ ।