तपाई कस्तो सम्बन्धमा हुनुहुन्छ ? आफूसँग सोध्नुहोस् यी प्रश्न

हामी सबै समय दिमागले मात्र चल्दैनौं । भावनाले पनि चल्छौं । यसैक्रममा सम्बन्धहरु पनि स्थापित हुन्छ । पछिल्लो समय प्रेम सम्बन्धका कारण धेरै युवाहरुको जीवन बर्बाद भैरहेको समाचार आउने गर्छ । सम्बन्धले कुनै दुर्घटना अकस्मात निम्त्याउँदैन, त्यहाँ पहिले देखि संकेतहरु हुन्छन् । सम्बन्धमा रहेका व्यक्तिले ती संकेतहरुलाई आफ्नो दिमाग प्रयोग गरेर हेर्नुपर्ने हुन्छ । आफू कस्तो सम्बन्धमा छु र आफ्नो जीवनमा के भैरहेको छ भन्ने कुरा विचार गर्नुपर्छ ।

आफ्ना समस्याहरु, आफ्ना मनका कुराहरु साथीसँग राख्न सक्छु ? सम्बन्धमा एक अर्काको आफ्ना कुराहरु, आफ्ना समस्याहरु बाड्ने, छलफल गर्ने, कुराकानी गर्ने हुनुपर्दछ । साथीले तपाईको समस्या समाधान नै गरिदिन नसक्ला तर साथीबाट तपाईलाई उ जस्तोसुकै अवस्थामा पनि तपाईको साथमा छ भन्ने आभास हुनुपर्छ ।

सम्बन्धमै आएका विभिन्न समस्यालाई पनि कुराकानी गरेर दुवै मिलेर समाधान गर्नतर्फ लाग्नुपर्छ । एक अर्काको सु : ख दु : खको साथी बन्नुपर्छ । एक अर्काको लागि समय दिनुपर्छ । होइन भने सम्बन्ध केवल नाम मात्रको सम्बन्ध रहन्छ ।

म सम्बन्धमा रहेर बढी खुसी छु या एक्लै रहँदा बढी खुशी थिए । सम्बन्ध दिर्गकालिन रहनको लागि सम्बन्धमा रहेका दुवै व्यक्ति सम्बन्धमा रहँदा खुशी रहनुपर्छ । यदि तपाईलाई सम्बन्धमा नरहँदा नै बढी खुशी थिए भन्ने लाग्छ भने तपाईलाई सम्बन्धका सम्झौता गरेको महसुस हुन थाल्छ । त्यसले सम्बन्धलाई असर गर्न थाल्छ । सम्बन्ध तपाईको लागि तनाव बन्नु हुँदैन ।

के हामीले एक अर्काको अलग पक्षलाई स्वीकारेका छौं ?
कोही पनि व्यक्ति हामीले चाहेजस्तो पूर्ण हुँदैन । हरेक व्यक्तिको संगत गरेपछि उसका अलग पक्षहरु देखिन थाल्छन् । सम्बन्ध तब मात्र दिगो बन्न सक्छ । जब हामीले एक अर्काको अलग पक्षलाई स्वीकार्न सक्छौं । तपाईले या तपाईको साथीले मूल्यांकन गर्न थाले, गुनासो  मात्र गर्न थाल्नुभयो भने त्यो सम्बन्ध तपाईको जीवनको तनावको एउटा कारण बन्छ ।

के म बाधिँएको छु ? सम्बन्धमा रहेपनि मैले मेरो स्वतन्त्रता गुमाएको छु ? सम्बन्ध कहिल्यै पनि कसैको लागि पनि बन्धन हुनुहुँदैन । प्रेमले मार्दैन, तपाईलाई फुलाउँछ । सम्बन्धले गर्दा तपाईले व्यक्तिगत चाहनाहरुलाई लगाम लगाउनु परेको छ या तपाई अरुको अनुमति, अरुको इशारा, अरुको चाहना अनुसार हिड्नुपर्ने, बोल्नुपर्ने, काम गर्नुपर्ने अवस्था छ भने त्यो प्रेम सम्बन्ध होइन, त्यो बन्धन हुन्छ । यस्तो अवस्थाले सम्बन्धमा रहेको व्यक्तिमा निराशा ल्याउनुका साथै दुर्घटना निम्त्याउन पनि सक्छ ।

के म यो सम्बन्धबाट अलग भएँ भने म अहिले भन्दा बढी खुशी रहन सक्छु ? तपाई अहिलेको सम्बन्ध भन्दा सम्बन्धबाट अलग भएर बढी खुशी रहन सक्नुहुन्छ भने त्यो सम्बन्धको कुनै अर्थ रहँदैन । त्यहाँ तपाईले आफूसँग नै सम्झौता गरिरहनुभएको छ । त्यसैले सम्बन्धलाई अगाडी बढाउनु तपाईको लागि घातक पनि हुन सक्छ ।