थुनुवा फरार प्रकरण : ड्युटी अफिसर लगायतलाई निलम्बन गरेर कारवाही गर्ने तयारी
नारीकोसिस डटकम/असार २४, काठमाडौं । महानगरीय प्रहरी प्रभाग भैंसेपाटीबाट तीन जना थुनुवा फरार भएपछि ड्युटी अफिसर र इन्चार्जलाइ निलम्बन गरी कारवाही गर्ने तयारी गरिएको छ। मंगलबार राति ड्युटीमा रहेका प्रहरी र इन्चार्जलाई महानगरीय प्रहरी कार्यालयमा बोलाएर सोधपुछ कार्य गरिरहेको कार्यालयका प्रवक्ता श्यामलाल ज्ञवालीले जानकारी दिनुभयो ।
‘उनीहरुलाई हामीले कार्यालयमा बोलाएका छौं। डिउटी अधिकृतसहित चार जनालाई तत्कालै निलम्बन गरेर थप अनुसन्धान अघि बढाउँछौं। रातिको डिउटीमा रहेका डिउटी अफिसर र इन्चार्जलाई कारबाही हुन्छ,’ ज्ञवालीले भन्नुभयो ।
गए राती प्रहरी प्रभाग भैंसेपाटीबाट विभिन्न मुद्दामा थुनामा रहेका रविनकुमार तिमिल्सेना, सम्शेर माझी र रुद्रलाल श्रेष्ठ गरी तीन जना थुनुवा कक्षको ग्रील तोडेर फरार भएका थिए।
फरार भएका तिमिल्सेना लागुऔषध मुद्दामा र अन्य दुई जना डाका चोरी मुद्दामा थुनामा थिए। उनीहरुको खोजीका लागि उपत्यकामा व्यापक प्रहरी परिचालन गरिएको छ।
तपाईको प्रतिक्रिया