अफगानिस्तानमा विवाह समारोह हलमा आत्मघाती विस्फोट
नारीकोसिस डटकम/भदौ १, काठमाडौं । अफगानिस्तानको एक विवाह समारोह हलमा गएराति पौने ११ बजे आत्मघाती बम विस्फोट भएको छ । विस्फोटमा धैरै नै कैयन हताहती भएको बताइएको छ । विस्फोटमा घाइते भएका २० जनालाई उद्धार गरी अस्पताल लगिएको छ ।
अन्तर्राष्टिय समाचार एजेन्सी रोयटर्सले प्रत्यक्षदर्शीलाई उद्धृत गर्दै विवाह समारोह भइरहेका बेला एक व्यक्तिले आत्मघाती हमला गरेको जनाएको छ । उनीहरुले घटनास्थलमा शव देखेको पनि जनाएका छन् ।
अफगानिस्तानमा सयौंको संख्यामा हलमा भेला भएर विवाह गर्ने परम्परा छ । विवाह समारोहमा पुरुष र महिला तथा बालबालिकालाई फरक फरक ठाउँमा राख्ने गरिन्छ ।
बीबीसीका अनुसार पुरुष बस्ने ठाउँमा विस्फोट गराइएको हो । विस्फोटको २० मिनेटसम्म विवाह हल धुवाँको मुस्लोले भरिएको थियो ।
बम विस्फोट गराइएको ठाउँ सिया मुस्लिम बाहुल्य क्षेत्र हो । अफगानिस्तानसँगै पाकिस्तानमा रहेका अल्पसंख्यक सिया हजारा समूदाय सुन्नी मुस्लिम आर्मी, तालिवान र इस्लामिक स्टेट समूहको निशानामा पर्दै आइरहेका छन् ।
विस्फोटको जिम्मा अहिलेसम्म कसैले पनि लिएको छैन ।
तपाईको प्रतिक्रिया