बहुविवाह मुद्दामा कैद सजाय पाएका सिरहा जिल्ला प्रदेश सांसद दिलीपकुमार साह निलम्बन हुने
नारीकोसिस डटकम/भदौ २३, जनकपुर । बहुविवाह मुद्दामा कैद सजाय पाएका प्रदेश सांसद दिलीपकुमार साहलाई निलम्बन गरिने भएको छ।
जिल्ला अदालतबाट चार वर्षअघि सुनाइएको फैसलालाई नै उच्च अदालतले समेत सदर गरेपछि प्रदेशसभाले उनलाई निलम्बन गर्ने भएको हो ।
नेकपाको टिकटमा सिरहा जिल्ला निर्वाचन क्षेत्र नम्बर ४ (१) बाट प्रदेशसभा सदस्य पदमा निर्वाचित साहलाई धनुषा जिल्ला अदालतले २०७२ जेठ १३ गते एक वर्ष कैद र पाँच हजार रुपैयाँ जरिवाना गर्ने फैसला गरेको थियो।
जिल्ला अदालतको उक्त फैसलाविरुद्ध १७ नम्बर गरेका साहलाई उच्च अदालत जनकपुरले पुरानै फैसला सदर गरेको सुनाइदिएपछि उनलाई निलम्बन गर्न प्रदेशसभाले प्रक्रिया सुरु गरेको हो।
सिरहाको मिर्चैया रामनगर बस्ने संगीता यादवको जाहेरी आधारमा सांसद साहलाई बहुविवाह मुद्दामा कैद र जरिवाना सजाय तोकिएको जिल्ला अदालतका तहसिलदारले जनाए।
साहले उच्च अदालतको आदेशमा चित्त नबुझेको भन्दै न्यायका लागि सर्वोच्च अदालत जाने बताएका छन्। ‘सहमतिमै अलग बस्ने भनिसकेपछि मैले दिनुपर्ने अंश दिइसकेर मात्रै अर्को विवाह गरेको हुँ’ सांसद साहले भने, ‘पछि सहमतिविपरीत मलाई प्रताडित गर्नकै लागि मुद्दा दर्ता गराइएको हो। म अन्यायमा परेको छु।’
तपाईको प्रतिक्रिया