इण्डोनेशिया सरकारले ल्याउन लागेको ‘बिहेअघिको सेक्स’लाई प्रतिवन्ध गर्ने विधेयकमाथि व्यापक विरोध
एजेन्सी । इन्डोनेसियामा ‘विवाह अघिको सेक्स’लाई प्रतिबन्ध लगाउने विधेयकविरुद्ध व्यापक विरोध प्रर्दशन सुरु भएको छ ।
प्रहरीले संसद अघि प्रदर्शन गरिरहेका प्रदर्शनकारीविरुद्ध अश्रुग्यास र पानीको फोहोरा प्रयोग गरेको थियो ।
प्रस्तावित विधेयकमा धेरै अवस्थामा ‘गर्भपतन’ र ‘राष्ट्रपतिको अपमान’लाई गैरकानुनी मानिएको छ ।
विरोध प्रदर्शनका बीच विधेयकलाई अघि अगाडि बढाइएको छैन तर प्रदर्शनकारीको मनमा यो विधेयक संसदबाट पास हुने हो कि भन्ने चिन्ता छ ।
के छ विधेयकमा ?
प्रस्तावित विधेयकमा एक नयाँ आपराधिक संहिता छ । त्यसमा रहेका केही विवादास्पद बुदा यस्ता छन्ः
–विवाह अघिको शारिरिक सम्पर्कलाई दण्डनीय अपराध मानिनेछ । यसको लागि एक वर्ष जेल सजाय हुनसक्छ ।
–विवाह हुनु अघि सँगै बस्नु, लिभ–इन सम्बन्धमा बस्नु पनि अपराध मानिनेछ । यसो गरेको पाइएमा ६ महिनासम्म जेल हुन सक्छ ।
–राष्ट्रपति, उप–राष्ट्रपति, धर्म, सरकारी संस्था र राष्ट्रिय झण्डा वा राष्ट्रिय गान जस्ता राष्ट्रिय प्रतीकको ‘अपमान’ अवैध छ ।
–गर्भपतन एक दण्डनीय अपराध हो । बलात्कार र चिकित्सा आपतकालीन घटना बाहेक अवस्थामा गर्भपतन गराएको पाइएमा चार वर्ष जेल सजाँय हुन सक्छ ।
यो विधेयकमाथि मंगलबार मतदान गर्ने कार्यसूची थियो । तर राष्ट्रपति जोको विडोडोले त्यसलाई शुक्रबारसम्मका लागि स्थगन गरेका छन् । राष्ट्रपति विडोडोले विधेयकमाथि थप विचार गर्न आवश्यक ठानेको बताइएको छ ।
किन विरोध ?
राष्ट्रपतिले विधेयकमाथि थप छलफल आवश्यक रहेको बताएका छन् । तर, जनतामा संसदबाट यो विधेयक पास होला भन्ने चिन्ता छ ।
नयाँ विधेयकमा भ्रष्टाचार निवारण आयोगलाई कमजोर पार्ने प्रावधान रहेको भन्दै इन्डोनेसियाका जनताले आक्रोश पोखेका छन् । इन्डोनेसियामा भ्रष्टाचारीहरुलाई कारबाही गर्ने मुख्य निकाय भनेकै भ्रष्टाचार उन्मूलन आयोग हो ।
के भयो विरोधमा ?
प्रदर्शनकारीले प्रहरीमाथि ढुंगामुढा गरेका थिए । जवाफमा प्रहरीले अश्रु ग्यास र पानीको फोहोर हानेको संचारमाध्यमले जनाएका छन् ।
प्रदर्शनको दौरान एक महिला प्रदर्शनकारी आफ्नो हातमा एक नारा लेखेकी थिइन् जसमा लेखिएको थियो ,‘मेरो चाहना सरकारको सरोकारको विषय होइन । ’
तपाईको प्रतिक्रिया