नेपाल र म्यानमारबीच पर्यटन तथा संस्कृतिसम्बन्धी समझदारी
नारीकोसिस डटकम/असोज ३० गते । नेपाल र म्यानमारबीच पर्यटन र संस्कृतिका क्षेत्रमा सहयोगसम्बन्धी समझदारीपत्रमा हस्ताक्षर भएको छ। म्यानमारको राजकीय भ्रमणमा रहनुभएकी राष्ट्रपति विद्यादेवी भण्डारी र त्यहाँकी स्टेट काउन्सिलर आङ सान सूकीबीच दुईपक्षीय वार्तापछि बिहीबार उक्त समझदारीपत्रमा हस्ताक्षर भएको हो।
राजधानी नेपितस्थित प्रेसिडेन्सियल हाउसमा भएको वार्तापछि परराष्ट्रमन्त्री प्रदीपकुमार ज्ञवाली र म्यानमार सरकारका अन्तरराष्ट्रिय सहयोगमन्त्री क्य तीनबीच दुई समझदारीपत्रमा हस्ताक्षर भई आदानप्रदान भएको हो।
राष्ट्रपति भण्डारी र स्टेट काउन्सिलर सूकीबीच उपहार आदानप्रदानसमेत गरिएको थियो। त्यसअघि राष्ट्रपति भण्डारी र म्यानमारका राष्ट्रपति विनबीच प्रेसिडेन्सियल हाउसमा भेटवार्ता सम्पन्न भएको थियो। राष्ट्रपति भण्डारीले सो हाउसमा राखिएको आगन्तुक पुस्तिकामा हस्ताक्षर गर्नुभएको थियो। त्यसअघि बिहीबार बिहान सो हाउसको परिसरमा राष्ट्रपति भण्डारीलाई म्यान्माको सेनाले सम्मान गारद ‘गार्ड अफ अनर दिएको थियो।
राष्ट्रपति भण्डारीका साथ परराष्ट्रमन्त्री ज्ञवाली, परराष्ट्र सचिव शङ्करदास वैरागी, राष्ट्रपति कार्यालयका सचिव डा हरि पौडेल, राष्ट्रपतिका प्रमुख स्वकीय सचिव डा. भेषराज अधिकारी, परराष्ट्र मन्त्रालय र राष्ट्रपति कार्यालयका उच्चपदस्थ अधिकारी सहभागी छन्। राष्ट्रपति भण्डारीले कात्तिक ३ गतेसम्म म्यानमारको राजकीय भ्रमण गर्नुहुनेछ। रासस
तपाईको प्रतिक्रिया