च्याम्पियन आमा

नारीकोसिस डटकम/मंसिर १७, काठमाडौं । तेक्वन्दोमा नौ वर्षअघि ग्योरोगी फाइट तर्फ स्वर्ण जित्नुभएकी आयशा शाक्य १३ औं सागमा पुम्सेको व्यक्तिगत स्पर्धा स्वर्ण जितपछि सोमबार एरिनाबाट बाहिरिँदा पति दीपक विष्ट र जेठा छोरा आदिशलाई अँगालो मार्दै धेरैबेर रुनुभयो। उहाँलाई सम्हालिन निकै गाह्रो भएको थियो ।

एउटा खेलाडीको रुपमा मात्रै होइन, एउटी आमाको रूपमा पाएको सफलतामा झरेको आँसु खुसीकै थियो ।

उहाँले कला प्रदर्शनी गर्ने तेक्वान्दोको खेल ‘पुम्से’ मा २९ वर्षमाथिको युगल स्पर्धामा पनि स्वर्ण जित्नभयो । सन्जिवकुमार ओझासँगै । यससँगै उहाँ दक्षिण एसियाली खेलकुद इतिहासमै ३ स्वर्ण कब्जा गर्दै सर्वाधिक सफल नेपाली महिला खेलाडी बन्नुभो । उहाँले सागमै २ रजत पनि जित्नुभएको छ। पुराना सबै सफलता ग्योरोगीमा हुन् । ओलम्पियन तथा सागमा सर्वाधिक चार स्वर्ण जितेका कीर्तिमानी दीपकका यी पत्नीलाई पुम्सेको राष्ट्रिय टिममा छनोट हुँदा प्रश्न गर्नेहरू पनि थिए । ती सबै ‘शंकालु’प्रति मीठो जवाफ बन्यो उहाँको दुई स्वर्ण । ‘आमाको रूपमा पुनरागमन गर्दा दबाब थियो, पुरानो आयशा हुन सक्दिनँ कि भन्ने थियो । आज यो स्वर्णले सबै जवाफ दिएकी छु,’ ३२ वर्षीया आयशाले भन्नुभयो, ‘म आफ्नै मिहिनेतले यहाँसम्म आएकी हुँ भन्ने प्रमाणित गर्नु अब अरु केही गर्नुपर्छ जस्तो लाग्दैन ।’ नेपाल तेक्वान्दो संघका सचिव तथा राष्ट्रिय तेक्वान्दो टोलीमा ग्योरोगीतर्फका प्रशिक्षक दीपकले पनि आफ्नो श्रीमती भएकै कारण आयशालाई संरक्षण मिलेको आरोप अस्वीकार गरे । ‘मेरा कारणले मात्र टिममा परेको भए उनले आज दुई स्वर्ण जित्ने थिइनन्, उनले आफ्नो क्षमता प्रस्तुत गरेरै राष्ट्रका लागि पदक जितेकी छिन्,’ दीपकले प्रस्ट पार्नुभयो । राष्ट्रिय तेक्वन्दो एकेडेमी, सातदोबाटोमा सफलता प्राप्त गरेसँगै आयशाले दूधे छोरालाई रुवाउँदै प्रशिक्षणमा खटिएको सम्झिनुभयो। वैदेशिक प्रशिक्षणमा रहँदा छोराहरूको यादमा तड्पिएको बताउनुभयो। अनि उहाँको क्षमता नबुझी नकारात्मक प्रतिक्रिया दिनेहरूलाई जवाफ दिनुभयो। सफलताले सबै पीडा बिर्साउँछ । कान्तिपुर दैनिकबाट