सागको सुखद समापन

नारीकोसिस डटकम/मंसिर २५, काठमाडौं । आगामी संस्करणमा पाकिस्तानमा भेट्ने वाचा गर्दै १३औं दक्षिण एसियाली खेलकुद सागको भव्य समापन गरिएको छ ।

दशरथ रंगशालामा मङ्गलबार साँझ नेपाल र भुटानबीचको पुरुष फुटबल फाइनल खेलसँगै विशेष समारोहबीच सागको भव्य समापन गरिएको हो ।

समापन समारोहलाई उपप्रधान तथा रक्षामन्त्री ईश्वर पोखरेल, ओलम्पिक कमिटीका अध्यक्ष जीवनराम श्रेष्ठ, राखेपमा सदस्यसचिव रमेश सिलवालले विशेष सम्बोधन गर्नुभएको थियो। सम्बोधनका क्रममा सबैले अथक प्रयासले छोटो समयमा साग सफलतापूर्वक सम्पन्न गरेको बताए । सोही अवसरमा नेपाल ओलम्पिक कमिटीमा अध्यक्ष जीवनराम श्रेष्ठले १४औं सागको आयोजक पाकिस्तान ओलम्पिक कमिटीका अध्यक्ष सैद अलि हसनलाई साग आयोजनाको झन्डा हस्तान्तरण गर्नुभएको थियो ।

झन्डा ग्रहण गर्दै अध्यक्ष हसनले नेपालको आतिथ्यले सबैलाई लोभ्याएको बताए । उनले आगामी संस्करणमा सबैलाई आतिथ्य दिन पाकिस्तान तयार रहेको बताउनुभयो । समापन समारोहमा खेलाडीको मार्चपास, सांस्कृतिक कार्यक्रम, विद्यालयका विद्यार्थीको प्रदर्शन तथा आर्मी, प्रहरी र सशस्त्र प्रहरीको संयुक्त ब्यान्ड र सराय नाचको विशेष प्रस्तुति रहेको थियो ।

समापन समारोहलाई प्रधानमन्त्री केपी शर्मा ओलीले भिडियोमार्फत विशेष सम्बोधन गर्नुभएको थियो । नेपालका पदक विजेता खेलाडी र प्रशिक्षकलाई प्रधानमन्त्री ओलीले बुधबार विशेष पुरस्कार घोषणा गर्ने कार्यक्रम छ ।
अन्नपूर्ण पोष्ट्बाट