अनेरास्ववियूको एकता टुङ्गियो, नुवाकोटबाट केन्द्रिय सदस्यमा प्रदिप शर्मा

नारीकोसिस डटकम/पुस २०, नुवाकोट । नेपाल कम्युनिष्ट पार्टी (नेकपा) का दुई विद्यार्थी संगठनको एकता टुङ्गो लागेको छ ।

पूर्व एमालेको अनेरास्ववियु र पूर्व माओवादी केन्द्रको अनेरास्ववियु (क्रान्तिकारी) एकताका लागि गठित कार्यदलले ३३५ केन्द्रीय समितिको टुङ्गो लगाएको हो ।

संगठनका फ्याक्सन इन्चार्ज हितमान शाक्य, सहइन्चार्ज विनोद ढकाल, संयोजक महर र सहसंयोजक तामाङसहितको फ्याक्सन कमिटीको शुक्रवार बसेको बैठकले एकता प्रक्रियालाई पूर्णता दिएको हो ।

बैठकले दुवै संगठनको एकतालाई पूर्णता दिँदै ३३५ सदस्यीय केन्द्रिय कमिटी घोषणा गरेको हो । जसमा तत्कालीन अनेरास्ववियुको तर्फबाट १८० र अनेरास्ववियु (क्रान्तिकारी) को तर्फबाट १५५ केन्द्रिय सदस्य बनेका मध्ये नुवाकोट जिल्लाबाट प्रदिप शर्मा पर्न सफल भएको छ ।शर्मा सामाजिक क्षेत्र तथा विद्यार्थी राजनीतिमा शक्रिय जुजारु युवा नेता हुन् ।

संगठनको संयोजकमा तत्कालीन अनेरास्ववियुका ऐन महर र सहसंयोजकमा अनेरास्ववियु (क्रान्तिकारी) का रञ्जित तामाङ रहेका छन् ।
बैठकले संगठनको १११ सदस्यीय सचिवालय र ४५ सदस्यीय स्थायी कमिटी पछि गठन गरिने निर्णय गरेको छ ।

यस्तै बैठकले निर्वाचन आयोग, अनुशासन आयोग र लेखा आयोगलाई पनि पूर्णता दिएको छ । निर्वाचन आयोगको अध्यक्षमा भाष्कर खनाल र सचिवमा गजेन्द्र देव चयन भएका छन् भने, अनुशासन आयोगमा प्रविणा अधिकारी अध्यक्ष र खेम मरासिनीलाई सचिवमा नियुक्त गरिएको छ । यस्तै, लेखा आयोगमा धर्मेन्द्र रोकाय अध्यक्ष र मदन भुल (रोशन) लाई सचिवमा नियुक्त गरिएको छ ।