कागेश्वरी मनोहरा नगरपालिका साक्षर नगर घोषणा: नगरलाई व्यवस्थित र नमूनाको रुपमा विकास गर्न जनप्रतितिनिहरु लागिपरिहेको नगर प्रमुख थापाको भनाई

नारीकोसिस डटकम /माघ ३ काठमाण्डौ । कागेश्वरी मनोहरा नगरपालिकालाई साक्षर नगर घोषणा गरिएको छ । शुक्रवार डाँछीमा आयोजित एक विशेष औपचारीक कार्यक्रममा प्रदेश नं ३ का सामाजिक विकास मन्त्री युवराज दुलालले कागेश्वरी मनोहरा नगरपालिकालाई साक्षर नगरका रुपमा घोषणा गर्नुभएको हो । उक्त कार्यक्रममा कागेश्वरी मनोहरा नगरपालिकाका प्रमुख कृष्णहरि थापाले साक्षर नगर घोषणाका लागि भएका सबै सूचकहरु पुरा गरी नगरलाई साक्षर नगर घोषणा गरिएको बताउनु भएको थियो ।

कार्यक्रममा  नगर प्रमुख कृष्णहरि थापाले नगरबासीको माग र चाहना बमोजिम विधि र प्रक्रिया अनुसार नगरपालिकाले कार्य गरिरहेको जानकारी गराउँदै व्यवस्थित र नमूना नगरपालिका बनाउन सम्पूर्ण जनप्रतिनिधिहरु सक्रियाता पूर्वक लागेकोमा प्रसंशा व्यक्त गर्दै नगरपालिकाले सडक, शिक्षा, स्वास्थ्य, खानेपानी , लगायत पर्यटन प्रवर्दन, साँस्कृतिक सम्पदाहरुको संरक्षण  नगरको समग्र विकास र समृद्धिलाई विशेष प्राथमिकता दिएर कार्य गरिरहेको वताउनु भयो । साथै व्यवस्थित र दिर्घकालिन विकासका लागि संघीय सरकार, प्रदेश सरकार, राजनीतिक दलहरु लगायत सरोकार निकायहरुसंग सहकार्य र समन्वय गरेर अघि बडिरेको जानकारी गराउनु भएको थियो ।

कार्यक्रमलाई संबोधन गर्नुहुदै नेपाल कम्युनिष्ट पार्टी (नेकपा) का वरिष्ठ नेता एवम् पूर्व प्रधानमन्त्री माधव कुमार नेपालले कागेश्वरी मनोहरा नगरपालिका साक्षर नगर घोषणा भएकोमा नगर प्रमुख कृष्णहरि थापालाई बधाई दिनुहुँदै नगरपालिकाले शिक्षा, स्वास्थ्य क्षेत्रलाई गुणस्तरीय बनाउन नगरको समग्र विकास र समृद्धिका लागि आगामी दिनमा अझ बढि सक्रिय भएर कार्य गर्नुपर्ने कुरामा जोड दिनुभएको भएको थियो ।

त्यस्तैगरी सो अवसरमा कार्यक्रमलाई संम्बोधन गर्नुहुँदै बाग्मती प्रदेशका सामाजिक विकास मन्त्री युवराज दुलालले प्रदेशको शिक्षा, स्वास्थ्य लगायत सामाजिक क्षेत्रलाई व्यवस्थित र मर्यादित बनाउन मन्त्रालयले पहल गरिरहेको बताउदै योजनाबद्ध रुपले प्रदेशको विकासका लागि सरकारले कार्य गरिरहको जानकारी  दिनु भएको थियो ।साथै प्रदेशलाई बालमैत्री बनाउन प्रदेश सरकारले पहल गरिरहेको बताउदै चालु आर्थिक बर्ष भित्रै बागमती प्रदेशलाई साक्षर प्रदेश घोषणा गरिने पनि बताउनु  भएको थियो ।

कार्यक्रममा जिल्ला समन्वय समिति काठमाडौंका प्रमुख शिवसुन्दर राजवैद्य ,कागेश्वरी मनोहरा नगरपालिकाको शिक्षा शाखाका प्रमुख गोविन्द पौडेल,  प्रदेश नं ३ को शिक्षा विकास निर्देशनालयका निर्देशक चन्द्र प्रसाद लुइटेल र शिक्षा विकास तथा समन्वय इकाई काठमाडौंका प्रमुख नन्दलाल पौडेल लगायतले शिक्षा, स्वास्थ्यका साथ साथै नगरको समग्र विकास व्यवस्थापन, आर्थिक विकास, सामाजिक विकास लगायत नगरलाई साक्षर नगर घोषणाका लागि भएका प्रयासहरुको बारेमा जानकारी गराउदै साक्षर नगर घोषणा संगसंगै यसको दिगोपनामा लागि विशेष ध्यान दिनुपर्ने बताउनुभएको थियो ।

कार्यक्रममा प्रदेश नं ३ का सामाजिक विकास मन्त्री युवराज दुलालले कागेश्वरी मनोहरा नगरपालिका साक्षर नगर घोषणा भएको अवसरमा प्रदेश सरकारको तर्फबाट नगर प्रमुख कृष्णहरि थापालाई कदर पत्र प्रदान गर्नुभएको थियो । त्यस्तैगरी सो अवसरमा  २०७५ सालको एसइइ परीक्षामा कागेश्वरी मनोहरा नगरपालिकामा भएका विद्यालयहरु मध्येबाट अध्ययनरत सर्बोत्कृष्ट अंक ल्याउने छात्रछात्राहरुलाई सम्मान पनि गरिएको थियो ।

कार्यक्रममा हालै काठमाडौंमा सम्पन्न दक्षिण एशियाली खेलकुद (साग) भाग लिएका कागेश्वरी मनोहरा नगरपालिका निवासी खेलाडीहरुलाई सम्मान पनि गरिएको थियो ।
विभिन्न साँस्कृतिक नृत्यहरु पनि प्रस्तुत गरिएको उक्त कार्यक्रममा जिल्ला समन्वय समिति काठमाडौंका उप-प्रमुख सरिता दाहाल, कागेश्वरी मनोहरा नगरपालिकाका उप-प्रमुख बिन्दु सिम्खडा पुडासैंनी सिम्खडा, जिल्ला समन्वय समिति काठमाडौंका जिल्ला समन्वय अधिकारी पीताम्बर अधिकारी, कागेश्वरी मनोहरा नगरपालिकाका प्रमुख प्रशासकीय अधिकृत गिरीराज ज्ञावली, प्रवक्ता राजाराम पुडासैंनी, वडा अध्यक्षहरु कुन्दन खड्का, जीवन थापा, प्रकाश फुयाँल, नगर कार्यपालिका सदस्य कला घिमिरे लगायत जनप्रतिनिधिहरु, कर्मचारीहरु, कागेश्वरी मनोहरा नगरपालिकामा भएका विभिन्न विद्यालयका शिक्षकहरु, विद्यार्थीहरु, व्यवस्थापन समितिका पदाधिकारीहरु लगायत सरोकारवाला निकायका प्रतिनिधिहरुको उल्लेख्य सहभागिता रहेको थियो ।