फेसबुकमा झुन्डिएका कारण बियर खुवाएर श्रीमतीको हत्या

एजेन्सी । भारतको जयपुरस्थित आमेर इलाकामा श्रीमानले आफ्नै श्रीमतीको हत्या गरेका छन् । श्रीमतीको चरित्रमाथि शंका गर्दै उनले हत्या गरेका हुन् ।

त्यहाँको प्रहरीले घटनाका आरोपी २६ बर्षीय अजाय अहमद अन्सारीलाई पक्राउ गरेको छ ।

अजायले २२ बर्षीया श्रीमती नैना मंगलानी (रेश्मा) को हत्या गरेका हुन् । करिब दुई बर्षअघि उनीहरुको प्रेम विवाह भएको थियो ।

प्रहरीका अनुसार, फेसबुकमा श्रीमतीको ६ हजार भन्दा बढी फलोअर्स थिए । उनी अधिकांश समय मोबाइलमै व्यस्त हुने गर्थिन् । यसैकारण यी दुईबीच झगडा भइरहन्थ्यो ।

यसै विषयमा हैरान भएका श्रीमानले श्रीमतीको हत्या गर्ने योजना बनाए । आइतबार बिहान श्रीमानले माइतमा रहेकी श्रीमतीलाई बोलाए । श्रीमतीलाई दिनभर बाहिर घुमाए । अँध्यारो भएपछि अजायले श्रीमतीको हत्या गरिदिए ।

उनीहरुको ३ महिनाको एक छोरा समेत छ ।

सोमबार भेटियो शव

अजायले भने, ‘आइतबार रेश्मालाई बोलाएँ । हामीले बियर पियौं । राति जयपुर–दिल्ली हाइवेमा रहेको माता मन्दिर नजिक सुनसान ठाउँमा लगेर घाँटी रेटेर हत्या गरें ।’ उनले शव लुकाउनका लागि ढुंगाले छोपिदिए । त्यसपछि उनी पत्नीको स्कुटर झाडीमा फालिदिएका थिए । प्रहरीले सोमबार शव फेला पारेको थियो ।

रेश्मा डिभोर्स मागिरहेकी थिइन्

विवाहपछिको केही समय उनीहरुको राम्रै चलेको थियो । पछि अजायले श्रीमतीको चरित्रमाथि शंका गर्न थाले । त्यसपछि उनीहरुबीच झगडा भइरहन्थ्यो । पछि रेश्मा मायत गएर बस्न थालेकी थिइन् । त्यसपछि उनले श्रीमानसँग डिभोर्स माग्न थालेकी थिइन् ।