ककनी गाउँपालिकाद्वारा ज्येष्ठ नागरिकलाई सम्मान र सुत्केरीलाई पोषिलो झोला वितरण

नारीकोसिस डटकम/मंसिर ११, नुवाकोट । ककनी गाउँपालिकाले ज्येष्ठ नागरिकलाई सम्मान र सुत्केरीलाई पोषिलो झोला वितरण गरेको छ ।

गाउँपालिकाले ज्येष्ठ नागरिकलाई हौसला स्वरुप सम्मान र सुत्केरी आमाहरुलाई सुरक्षित सुत्केरी गराउन उत्प्रेरित गराउने उदेश्यले  सो सम्मान तथा  झोला  वितरण गरेको हो ।

मंगलबार गाउँपालिकाको वडा नं. ६ र ७ का ज्येष्ठ नागरिकहरुलाई ७ नम्वर वडाका सुत्केरी आमाहरुलाई पोषिलो झोला बितरण गरिएको थियो ।

गाउँपालिकाका अध्यक्ष मानबहादुर लामा, उपाध्यक्ष सीता खतिवडा लामा र प्रमुख प्रशासकीय अधिकृत टुनाबहादुर श्रेष्ठले संयक्त रुपमा वडाका ९० बर्ष माथिका ९ जना ज्येष्ठ नागरिकहरुलाई जनही दुईहजार रुपैयाँ नगदसहित दोसल्ला र प्रमाणपत्र प्रदान गरी सम्मान सहित न्यानो कपडा र सुत्केरी आमाहरुलाई पोसिलो झोला बितरण गर्नुभएको थियो ।

वडा नम्वर ७  चतुरालेस्थितका   ८ जना सुत्केरीहरुलाई पोषिलो झोला बितरण गरिएको गाउँपालिका अध्यक्ष लामाले जानकारी दिनुभयो।

कार्यक्रममा सुत्केरीहरुलाई सुरक्षित सुत्केरी गराए बापत सरकारको तर्फबाट दुईहजार रुपैयाँ र गाउँपालिकाको तर्फबाट तीनहजार रुपैयाँ उपलब्ध गराईएको उपाध्यक्ष लामाले बताउनुभयो ।